潘志文樂做湊女公

 

     潘志文縱橫影視圈中數十載,依然Keep住樂觀態度。

    劇集《大藥坊》中嘅潘志文,佢演嘅角色「莊敦儒」每晚都令一眾電視機前嘅「師奶」看得牙痕痕。她們大多驚嘆的是,潘志文「咁嘅年紀」到今日,都依然係Keep得咁溫文爾雅,除咗可以同謝雪心(心姐)做配搭外,你放個「高Ling」高海寧喺佢隔籬都唔會覺得係爺孫戀。男人襟老,確實着數。

    笑言反派角色容易發揮的潘志文,縱橫影視圈中數十載。從「友台」同馮寶寶的《萬家燈火》,以及講到同胡美儀、毛俊輝夫婦合作舞台劇;由五台山廣播道到將軍澳電視城,一路下來作品雖多,但潘志文卻記得清清楚楚。


    薑還是老的辣


    「好似心姐咁,我同佢講以前喺友台都合作過啦,佢就好似醒唔起,咁可能真係唔記得啦。(咁同心姐再合作覺得點?)咁梗係人又仲咁靚,又熟讀劇本,講嘢又嗲聲嗲氣,我老婆都無佢咁嗲啦!」果然,薑還是老的辣。
刻下正同李思捷、馬德鐘、徐子珊等拍緊《以和為貴》的潘志文。問到一劇接一劇係咪好辛苦?佢就反而認為舊時辛苦好多:「依家好多時都有規有矩喇,嗰陣時『飛紙仔』仲厲害,當年試過拍麥當雄套劇,成班去到黃石碼頭,Book晒遊艇同到會食物,點知『紙仔』都未到唔拍得!你話吖。」


    讚花旦演技好


    提到現在同無綫不少靚女花旦都有合作,潘志文就表示自己其實似「湊女公」:「以前都同陳慧珊、張可頤佢哋合作過,嗰陣都未紅佢哋。同埋我發現依家啲女仔,好多個都係唔多識中文嘅,可能喺外國返嚟啦,劇本都要用拼音。不過佢哋都好努力,個個做戲都好好。啊!唔知係咪溫哥華返嚟嗰啲都咁Good呢?好似鍾嘉欣今次做我個新抱咁!演得好自然。以前我哋後生好『驚死』,慌死人哋話自己無演技,搏命做。你睇吓依家話好演技嗰啲,好似無乜表情?咋!」

 

 

◎以上轉載新聞版權歸屬香港新報所有